गोरखामा बाढीले ३ घर बगायो

काठमाडौं — उत्तरी गोरखाको चुमनुब्रीमा बाढीले ३ वटा घर बगाएको छ ।

उक्त गाउँपालिका वडा नं. ४ भएर बग्ने मान्द्रुङ खोलामा आएको बाढीले राती ३ बजे ३ वटा घर बगाएको हाे ।

बाढीले चुमनुब्री गाउँपालिका-४ नाम्रुङ का नगु छिरिङ, उर्गीन लामा र लाक्पाभुटी लामाको घर बगाएको गाउँपालिका अध्यक्ष निमा लामाले जानकारी दिए ।

भारी वर्षापछि मान्द्रुङ खोलामा बाढी आउँदा एउटा फलामको पुलमा समेत क्षति पुगेको गोरखाका डीएसपी राजकुमार श्रेष्ठले जानकारी दिए ।

बाढीबाट मानवीय क्षति भने नभएको र अहिले वर्षा रोकिएका कारण खोला घट्ने क्रममा रहेको डीएसपी श्रेष्ठले बताए ।

प्रशासनले उक्त नदी तटीय क्षेत्रमा रहेका नागरिकलाई सतर्कता अपनाउन अनुरोध समेत गरेको छ।